poesia e lenga

Una jornada a Lodeva a escotar de poetas legir o explicar la lor òbra los pès dins l'aiga o dins de patios privats. Bona limonada.
una pensada poetica, una escritura plurilenga per los qu'escrivon en ebrèu o en arab. aquí la remarca tomba e e pas relevada per degun qu'en fach comprenon pas çò que dison.
Un marocan trabalha amb lo reviraire, un israelian se fa passar per un palestinian per èsser publicat dins son païs. La lenga s'es convidada, e los franceses pensan que son dins un pais que ia pas de mond bilingues.

Una mirga perseguida per un cat se refugís dins un trauquet. a un moment ausís un gos que jaupa, alara se pensa que lo cat a degut partir puèi que ia lo cat. naseja e tomba sul cat que li sorís.
la mirga li demanda coma a fach per imitar lo gos, lo cat respond que se farà totjorn prene se pensa pas dins un cadre multilenga!!!!

estiu

moments de vacanças
temps per manejar l'ostal
escobas dins lo jardin, per escampar las fuèlhas dins un revolum ventós
oradas per ausir las paraulas agradivas e plan dichas de la ràdio
passejadas a la platja, al mercat dins la vila toristica
jornadas, estirada sul cadieral defòra
legidas estivalas per pausar la clòsca.

cantar

ai ausit de polidas causas a Rodez. De mond que fan de causas artisticas, qu'i trabalhan fòrça.
Los que me fan lenga son los que cantan, que fan aquò gaireben d'aise. Totes m'an fach venir las lagremas...
ièu tanben voldriái cantar ma votz. quicòm qu'es embarrat dedins e que demanda de mai en mai a sortir. ai comprés que lo ventron amaga, empacha aquesta causa de sortir, protegís quicòm.

ai pas jamai capitat de perdre lo ventre, es totjorn estat grasolhet aquí.

vent.

Qu'es aquò! de vent, ventàs que bufa, de quin costat que siá.. n'ia totjorn un per s'i metre.
s'estirar sus la sabla es desagradiu, se sentís pas sus la pèl la calor que caufa, que fa destibar los muscles.
Qu'es aquò! ont a passat l'estiu?
los toristas se'n van, las carrièras son pas plenas de mond, ia pas l'ambient vacancièr necessari per las apreciar plan.

anem! zo! totes a rodez!

l'estiu per faire la fèsta...per l'Occitan e la cultura ia la causida :al ras de la mar un fum de causas son prepausadas per que los toristas trapen d'ocupacions.
los occitans se dobrisson als autres perqu'ajan pas tròp paur: aital a Besièrs per fèsta d'oc, arser anèri passejar sus las alèas per escotar 'du Bartas' un grop que coneissiái pas. suspresa de veire al mitan sus l'empont Laurenç Cavalier. aqueste solet o acompanhat estimi plan çò que canta.
Dansar al son de sa votz e de l'acordeon, foguèron maites a se sarrar per partejar una dansa.
degun partiguèt pas quand daissèt la plaça a 'Lo còr de la plana'. avem pas tròp l'escasença de los ausir que son a Marselha, quin plàser per las aurelhas!!!!!!

a escotar las doas còlas cantar e faire dansar de mond que son pas occitan.....istas, me soi pensat que benlèu trapam lo succès dins la coneissença populària qu'aquestes ensajan de transmetre d'un biais que se pòsca estimar a l'ora d'ara. Tre que lo mond percebon un sens, una autenticitat son lestes a apreciar quicòm quina que siá la lenga.
soi contenta de coneisser d'artistas aital.

D'unes los traparem a rodez la setmana que ven... Anem zo! totes a rodez!

of! es acabat!

Les Bienveillantes: Jonhatan Littell, 894 paginas.
aquò's lo libre que faguèt parlar tot lo mond dempuèi qu'a agut lo prèmi a la fin de l'annada passada.

m'a calgut 2 meses per lo legir, non pas per la longor mas perque me caliá faire de pausas e tornar prene lo buf.
L'eròi a un doctorat en drech, ven d'acabar al moment que la guèrra comença entre Alemanha e Euròpa. Es membre del partit nacional- e se fa engatjar dins la SS. tot lo long del libre mòstra la dificultat de faire trabalhar lo mond dins lo meteis sens e mai amb l'ambicion qu'èra pel melhor pel pòple. L'administracion vòl gardar son independéncia, cada cap tan pichòt coma que siá cerca lo poder que pòt aver. son trabalh es de contrarotlar, faire passar los messatges entre las categorias administrativas.
Aquò lo mena sul front russe, que li permet de faire lo retrach de l'òme-soldat que espèra lo combat per s'ocupar, o qu'es a se demandar quora la mòrt passarà lo prene. deliris, desesperança, vam per combatre, totas las actituds i son. per el, una bala dins lo suquet per s'estavanir e èsser salvat e remandar a Berlin coma nafrat de guèrra, per ganhar la medalha de l'eròi!
Solide que se preocupa de l'eliminacion dels enemics del regime: los comunistas, los tziganas, los omosexuals e los josius.
la tòca èra de faire trabalhar los òmes abans que los tuèsson. Los faire partir de las vilas per las purificar, los parcar en esperant que los metòds eficaces per los eliminar foguèsson trapats!
ditz la dificultat qu'aguèron per acostumar los soldats a tirar, e lo temps que perdián.
l'oror aquí sortís de l'associacion que fa entre lo paisatge de la forest tras que polida e la mòrt sistematizada del òmes e de las femnas, que paures d'eles sabián pas ont anvan.
Cada còp qu'arriba de nos prene e nos faire dintrar dins lo sistèma e sos problèmas d'organizacions, fa seguir lo passatge per de scenas tarriblas per nos ramentar çò que faguèron contre l'umanitat.
L'istòria es mesclada amb la sieuna: la maire maridada amb un francés, lo paire membre del partit desaparegut aital, e la bessona que n'es amorós al punt que pòt pas aimar las femnas e que supòrta sonque las relacions sexualas amb los òmes. Per aquò se deu amagar.
La fin se sarra, Alemanha demòra arroinada, la foliá es de pertot, los enfants abandonats son venguts salvatges, violents que sabon pas çò qu'es lo mal e lo ben. lo paisatge e las vilas destrusidas de cap en cima, la populacion sola atalentida o mòrta. Los oficièrs a ensajar de fugir per gardar un poder pichòt, reconversion per d'unes, incompreneson per d'autres.
Lo futur serà possible perque fa del pais una taula rasa, verge de tot.
Parièr per son istòria, contunha perque fa desapareisser los que coneisson sos limits e sa foliá.

vaquí per un libre que pensi que o cal legir, que parla de çò qu'es l'umanitat e la condicion umana. las forças e la fragilitat e los limits de l'òme. Benlèu que doblidi de causas que pòdon pareisser importantas...

aisina

enfin lo novèl ordenator es arribat... me ne cal de temps per decidir de crompar una aisina practica, aviada, que prepausa un accès a la tela de bona qualitat. a l'escasença, ai descobèrt de noms coma 'ethernet', ( s'ai fach una deca ortografica, m'enaurarai dins lo cèl).
dempuèi ièr, me passegi sus la tela, compreni ara la metafòra de surf, que l'aviadesa es tras que confortabla.

aquò me dona enveja d'escriure mai sovent que la connexion se fa pas esperar, o vòls aquí l'as...
alara a pro lèu abans que me n'ane a Rodez per "estivada"

uoe de Nimes

cada an, fa ja uèch ans, vau a l'universitat d'estiu de Nimes. es un endrech de reflexions, de discutidas.
i trapam de gents que se vesem un còp l'an, fa plàser de se rescontrar, de rire, e tanben dansar ensèms. aqueste es la botelha plena, lo vuège es que son totjorn los meteisses, que ia pas de novèls. alara la soscadissa vira en redond, entre personas que se contredison parièr talament se coneisson.
la question màger de l'estiu ara, cossí motivar lo mond a venir escotar de conferéncias mentre que son las vacanças?
benlèu que quora la valor trabalh serà a la mòda, la culpabilitat de se pausar emplenarà las escòlas...
pasmens la cultura e lo plàser d'ausir los neurònes trabalhar deurián èsser sufisent per desplaçar lo mond
sabem que lo còst es una marrida rason, perque n'avem totjorn per anar luènh en vacanças!

alara bonas vacanças e a l'universitat venenta.