que dalle!

Dimècres en fin d'après-dinnada, dintri dins l'ofici de torisme(endrech estranh per una conferéncia dobèrta a totes mentre que sus la pòrta lo panèl disiá: barrat per causa de parladissa....)
ièu, soi dintrada: ai vist primièr Florian Vernet e l'ai ausit tanben.
veniá presentar lo libre sus las expressions francesas que venon de l'occitan.
de descobèrtas, per ièu genialas! i soi pas demorada longtemps, que lo tren m'esperava pas, mas ai aprés un fum de causas.
un exemple: l'avoir dans le baba: la vava es le vagin.
dins un diccionari etimologic: de baba, gâteau car ce mot polonais a aussi le sens de 'vieille femme', d'où l'idée générale de rondeurs.
pas brica la pena de commentari, una sola causa de dire mai: coitatz vos de comprar aqueste libre.
Que dalle! Quand l'argot parle occitan IEO edicions març 2007

'arrivage' d'écrivains

A Montpelhier, es la dimenjada dels escrivans: son totes assetats los uns a costat desl autres, lor nom pegat endessús o endejós, amagat darrièr de molons de libres que deu baissar a flor e a mesura que la jornada avança. Son dins de gàbias dobèrtas e lo mond passejan davant.
quin trabalh! que cal saber legir de galís! lo títol del libre, lo nom del tipe, e la cara. Los uèlhs van e venon sens jamai s'arrestar sus pas res! Cossí far autrament?
Que pòt pensar lo tipe, assetat darrier los libres? Una jornada dins la calorassa del plan de la comèdia, dins la polsa, dins lo revolum montpelhierenc: es crebat sonque d'i pensar.
Espèra lo legeire que va venir quérre una dedicaça que n'aurà pas res a fotre tre que serà tornat a l'ostal. Agacha las braves gents que s'arrestan pas, que lo veson quitament pas.
Se sentir solet en soscant a la derision del rescontre? orgulh macat d'èsser pas reconegut?
Pòdon sentir çò que vòlon, lo legeire o sauprà pas.
ièu, pòdi totjorn pantaissar a un rescontre original, es pas l'endrech. Legissi.
es benlèu aquí lo rescontre vertadièr, dins lo libre.

un divendres per mes

fa qualques meses ara, que participi a un escambi suls libres legits. ia pas res de professional! se passa dins una librariá, qu'apèla aquò 'prête- moi ton livre'. m'avisi que a flor e a mesura tot lo mond pren la paraula, gausa parlar, que los tèxtes son mens escriches e que cadun vira a l'entorn del meteis subjècte. aital se fasèm una idèa mai precisa sus eles, al mens comprenem qu'aqueste sicut es important per eles.
Los sorires escambiats son de mai en mai dobèrts.
e Los libres interessants, dins l'actualitat...
ça que là ia quicòm que truca es que ia de mens en mens d'òmes dins aquestes rescontres! aquò s'apren al tipe de rescontre? a la manca d'intelectualitat? als subjèctes abordats?
ièu, me geina que se n'anen totes perque vendrà un luòc 'forra-borra' de femnum embarrat sus se, que parlarà totjorn parièr sens vertadièr rescontre!

es pas perque es lo nòstre...

los nenets son polits, non lo nenet que veni de me n'ocupar es fòrça polit, risolièr, pas ploraire, grandet per son atge, plan vestit, escota plan quand una li parla... canta tanben, li agrada de dançar ... chuca lo botelhon e comença de manjar: aima melhor lo sucrat...
enfin, aurètz comprés que soi estada conquisa per un pichonet de 6 meses....
mas MEFI! pas tròp saique que ai agut temps de faire pas res. me soi quitament pas repausada, que la nuèch que creses de dormir, gemega qu'a perdut lo d'aquòs dins la boca. te li o cal tornar metre.Fa lo penequet, tu as pas temps que te cal aprofiechar per lavar l'ostal.

tot aquò per dire que los dròlles pas per ièu, vòli pas passar lo diplòma "nounou agrée"
urosament ai pogut legir un pauc, ne vos parlarai lèu.

sentimentalisme

Quand lo vent de nòrd bufa, m'asseca los pòts e tanben los uèlhs. Aquò me dòl, e subretot los uèlhs que pòrti de lentilhas. Ai trapat un biais!!!!

Lo uèlhs me demòran pas jamai secs quand soi la testimònia de moments esmovents. De còps se meton a plorar e m'avisi alara que soi esmoguda mentre que l'aviái pas remarcat.
auriái pogut pensar qu'èra una forma d'allergia. tè! aquò es interessant de o pensar aital. soi un monstre allergic als sentiments!!! NON aquò es una galejada. M'alègran de veire de films"sentimentals" e mai de ne legir d'istòrias, en fach es coma dintrèsse dins una bofiga confortabla. las lagremas ne son l'aiga bugadanta d'aqueste banh regenerator. La sentimentalitat me permet de tornar creire a l'umanitat, de me tornar convéncer que la vida val lo còp.

Lo solelh

dempuèi qualques jorns lo jorn se lèva mai d'ora, es agradiu de veire lo solelh tre lo matin. Los scientifics dison que enleva la depression un pauc. Me disi que las flors devon sentir aquò quand espelisson, lo fach de sortir de quicòm e subretot aver l'impression de s'estirar e de prene tota la plaça que te cal. un pauc coma quand te desrevelhas e qu'estiras plan lo rastèl.

quand comenci aital la jornada, pòdi sorire. e vaquí que lo sorire fa parièr coma lo solelh pels autres. Lo mond son mens nervioses, te respondon en se metent al meteis ritme coma tu. doncas se sentisson ami calmes après. ai d'experiéncias de vendeires un pauc agressius e que sulcòp cambian de tonalitat. Aquò me fa plaser per eles.

Lo problèma es que ièu, vesi pas jamai mon sorire e doncas escapi a l'efièch!!